1 Corinthians 6
Ukumangalelana Phakathi Kwabakholwayo
1Uma owakini elombango lomunye kufanele ukuba aqunge isibindi ayemmangalela kwabangakholwayo ekubeni aye kwabangcwele na? 2Kalazi yini ukuthi abantu bakaNkulunkulu bazakwahlulela umhlaba na? Uma lizakwahlulela umhlaba, kalanelisi ukwahlulela amacala amancane na? 3Kalazi yini ukuthi sizakwahlulela izingilosi? Pho sizakwehlulwa yini ukwahlulela izindaba zale impilo! 4Ngakho-ke, uma lilemibango yezindaba ezinje, khethani abantu abachumileyo ebandleni ukuba ngabehluleli. 5Ngitsho lokhu ukuba ngiliyangise. Kungenzakala yini ukuthi akulamuntu phakathi kwenu ohlakaniphe okwaneleyo ukuba ahlulele umbango phakathi kwabakholwayo na? 6Kodwa esikhundleni salokho, omunye umzalwane uya emthethweni ukuyamangalela omunye – njalo lokhu ekwenza phambi kwabangakholwayo! 7Khona lokhu ukuthi impela kulokumangalelana phakathi kwenu kutsho ukuba selehlulwe ngokupheleleyo. Kakungcono yini ukwamukela ukoniwa? Kakungcono yini ukwamukela ukuqilibezelwa? 8Esikhundleni salokho, lina ngokwenu liyaqilibezela njalo lone, futhi lokhu likwenza kubazalwane benu. 9Kalazi yini ukuthi abaxhwalileyo kabayikudla ilifa lombuso kaNkulunkulu? Lingakhohliswa. Akulazifebe ezixhwalileyo loba abakhonza izithombe loba iziphingi loba amawule esilisa loba abesilisa abaphinganayo 10loba amasela loba izihwaba loba izidakwa loba abanyeyayo loba amaqili azakudla ilifa lombuso kaNkulunkulu. 11Njalo lokho yikho abanye benu ababe yikho. Kodwa selageziswa, selangcweliswa, selalungiswa ngebizo leNkosi uJesu Khristu langoMoya kaNkulunkulu wethu.Ukuxhwala Kobufebe
12“Izinto zonke zivunyelwe kimi,” – kodwa akusikho konke okusizayo. “Izinto zonke zivunyelwe kimi” – kodwa angiyikubuswa lutho. 13“Ukudla kwesisu lesisu sokudla” – kodwa uNkulunkulu uzakuchitha kokubili. Umzimba kawusiwo wokuxhwala lobufebe, kodwa ngoweNkosi, leNkosi ngeyomzimba. 14Ngamandla akhe uNkulunkulu wayivusa iNkosi kwabafileyo, lathi futhi uzasivusa. 15Kalazi yini ukuthi imizimba yenu iyizitho zikaKhristu uqobo na? Kambe ngingathatha izitho zikaKhristu ngizihlanganise lesiphingi na? Hayi! 16Kalazi yini ukuthi lowo ozihlanganise lesiphingi uba munye laso emzimbeni? Ngoba kuthiwa, “Labo ababili bazakuba nyamanye.” 17Kodwa lowo ozihlanganisa leNkosi munye layo emoyeni. 18Balekelani ukuxhwala kobufebe. Zonke ezinye izono umuntu azenzayo zingaphandle komzimba wakhe, kodwa lowo owenza isono sobufebe wenza isono emzimbeni wakhe. 19Kalazi yini ukuthi umzimba wenu ulithempeli likaMoya oNgcwele, ophakathi kwenu, elamamukela kuNkulunkulu na? Kalisibo benu, 20lathengwa ngentengo. Ngakho-ke dumisani uNkulunkulu ngemizimba yenu.
Copyright information for
NdeIBE